*रोजगार हमी योजनेतील भ्रष्टाचारावर लातूरमध्ये मोठी कारवाई !*
दैनिक विश्वउदय न्युज नेटवर्क :-लातूर जिल्ह्यातील रेणापूर पंचायत समितीच्या सहायक कार्यक्रम अधिकाऱ्याला (कंत्राटी) लाचलुचपत प्रतिबंधक विभागाच्या पथकाने रंगेहाथ अटक केली आहे. रोजगार हमी योजनेतील विहीर मंजुरी व नाव दुरुस्तीसाठी १५ हजार रुपयांची लाच मागितल्याच्या तक्रारीवरून ही कारवाई करण्यात आली. तक्रारदाराने ८ मे रोजी तक्रार दाखल केली होती, त्यानंतर २० मे रोजी सापळा रचून आरोपीकडून १२ हजार रुपये स्वीकारताना त्याला पकडण्यात आले.
झडतीदरम्यान आरोपीकडून लाच रक्कम व मोबाईल जप्त करण्यात आला असून, त्याच्या निवासस्थानीही झडती घेण्यात आली आहे. या प्रकरणी रेणापूर पोलीस ठाण्यात भ्रष्टाचार प्रतिबंध अधिनियम १९८८ अंतर्गत गुन्हा दाखल करण्याची प्रक्रिया सुरू आहे.
ही कारवाई पोलीस उप अधीक्षक संतोष बर्गे यांच्या मार्गदर्शनाखाली पार पडली. लाचखोरीविरोधातील ही धडक कारवाई प्रशासनातील पारदर्शकतेसाठी मोठा इशारा ठरली आहे. लाचलुचपत प्रतिबंधक विभागाने पुन्हा एकदा सिद्ध केले की, भ्रष्टाचार करणाऱ्यांना कोणतीही गय दिली जाणार नाही.
_ही घटना समाजात प्रगल्भता आणि प्रशासनात पारदर्शकता आणण्यासाठी महत्त्वाची ठरली आहे. नागरिकांनी अशा प्रकारच्या लाचखोरीविरोधात पुढे येऊन तक्रार दाखल करावी, असे आवाहनही प्रशासनाने केले आहे._
